Suresh Ki Chai – Mandi House

Aaj ka din kuch alag sa tha…
Mere haath mein lunch tha aur main Mandi House ki khuli-khuli sadkon par akela chal raha tha.

Ab aap puchoge ki akela kyun?

To iska jawab thoda sa ajeeb hai…

Main ek naadan sa ladka, jo apni college internship Mandi House mein kar raha tha. Aur jis department mein main kaam karta tha, waha sab madam hi madam thi… ek bhi ladka nahi.

Ab bhaiya… humein thodi sharam aati hai.

Isi sharam ke maare hum unke saath baithkar lunch kar nahi paate the.
To roz ka ek chota sa riwaaz ban gaya tha…

Lunch uthao… aur nikal pado bahar.

Kabhi kisi ped ke neeche baithkar khaya…
kabhi gaadi ke bonnet par rakh kar…

Kabhi park ki bench par…
to kabhi kisi bike par dabba rakhkar hi lunch nipta liya.

Aur phir muh saaf karke nikal padte the Mandi House ko thoda aur dekhne…

Jaane kya chhupa hai is jagah mein.

Mandi House ki Sadke

Women's college ki taraf se hota hua main aise hi idhar-udhar nikal pada tha.

Kabhi kisi road par mud jaata…
kabhi kisi aur gali mein chal padta…

Aur aaj jis road par main tha, waha ek popcorn wala popcorn bana raha tha.

Maine socha… chalo aaj popcorn bhi ho jaaye.

Halki-halki jhadi si baarish ho rahi thi…
Main thodi si oat mein khada hokar haule-haule popcorn ka maza le raha tha.

Popcorn wala saath mein moongfali bhi sek raha tha.

Un seeli moongfaliyon ki khushboo…
aur garam popcorn ka swaad…

Maano dono milkar ek alag hi mehfil saja rahe ho.

Main popcorn khata hua us khushboo ka anand le hi raha tha ki achanak…

Baarish tez ho gayi.

Baarish aur Ek Khoka

Main… mera lunch… aur mere popcorn.

Main bhaagta hua side mein hua to mere popcorn uchhal kar neeche gir pade.

Unhe jaldi se utha kar side mein rakha…
aur jaise hi meri nazar upar uthi…

Maine saamne ek chhota sa khoka dekha.

Mann mein turant khayal aaya —

“Shayad yahi chai milegi…”

Dil keh raha tha chai wala hai…
mann keh raha tha dhaba hai…

Par baarish itni tez thi ki maine socha — jo bhi ho, bhaag kar wahi chalte hain.

Main jhuk kar us khoke ke andar ghusa hi tha ki…

Ubalti hui chai ki mehak seedha mere zehen tak pahunch gayi.

Chai…
main…
aur meri chai ki talab…

Perfect combination.

Bahar tez baarish…
andar ubalti chai.

Suresh Bhai ki Chai

Maine muskura kar pucha:

“Are bhaisaab… chai jitne pyaar se ubaal rahe ho, utne hi pyaar se iska rate bhi bata dijiye.”

Chai wala hasta hua bola —

“Arre bhaiya… 20 rupaye ki hai.”

Maine turant kaha —

“Ek kadak chai humare liye bhi laga dijiye.”

Wo muskura kar apne kaam mein lag gaya.

Baarish bahut tez ho chuki thi.
Mujhe paas hi ek patthar dikha, jiske upar main haule se baith gaya.

Baithkar maine dekha ki baarish ka paani dheere-dheere khoke ki taraf bhi aa raha tha.

Maine haste hue kaha —

“Bhaiya… paani to andar aa jayega.”

Bhaiya bole —

“Nahi bhaiya… ye baarish ka paani andar aane se pehle hi ruk jayega. Jab tak ye andar aane ki koshish karega, tab tak baarish band ho chuki hogi.”

Main hasa…
aur bola — “Lagta hai aapko kaafi experience hai.”

Bhaiya muskura ke bole —

“Pehli baar dekha hai aapko… kya naam hai aapka?”

Maine kaha —

“Bhaiya, naam hai Shubham Babu. Yaha Mandi House mein internship karne aaya hu… isliye lunch mein idhar-udhar ghoomta rehta hu.”

Bhaiya bole —

“Idhar-udhar kyun jaate ho bhaiya…
Suresh bhai ke paas aa jaya karo.”

“Yahi lunch kar liya karo… aur yahi se chai peeke jana.”

Unki baat sunkar dil ko ek ajeeb si tasalli mili.

Maine kaha —

“Zarur bhaiya… ab to aayenge hi.”

Kulhad ki Garmahat

Itne mein bhaiya ne kulhad uthaya…

Chai chaani…
aur kulhad mein bhar kar mujhe de di.

Kulhad ki garmahat…
chai ki mithaas…

Bahar tez baarish…
aur khoke ke andar se aati halki-halki hawa.

Wo hawa jab mere baalon se takra kar wapas ja rahi thi…

To chai ka har ghunt aur bhi suhana lag raha tha.

Us pal maine ek alag hi anubhav mehsoos kiya.

Mann itna prasann ho gaya ki laga…

Baaki ki internship shayad maine Suresh ki chai par hi kaat di.

Agar Kabhi Mandi House Jaao…

Agar kabhi tumhara mann ho…

Aur tum Mandi House ki taraf nikal jao…

To ek baar Suresh bhai ki chai zarur peena.

Shayad tumhe bhi wo pal mil jaaye
jo mujhe us din mila tha.

📍 Location ke liye email karein

– Aapka apna chai premi