UPSC Lane Ki Chai

Ek Bechain Dopahar

Mann kuch theek nahi tha… dopahar ka waqt tha.
Ghar mein mann nahi lag raha tha.

Socha bahar nikal jaun… par jaise hi bahar dekha, halki si jhar wali baarish ho rahi thi.
Dil aur thoda maayus ho gaya.

Laga jaise har cheez mujhe rok rahi ho.

Mann bechain tha… samajh nahi aa raha tha kya karun.
Rone ka bhi mann tha… par phir socha — thoda sa hi sahi, bahar to nikalta hoon.

Ek Parchi Aur Ek Sapna

Main wapas andar gaya… bag uthaya, umbrella dhundne laga.
Tabhi ek purani si parchi haath lagi…

Us par likha tha — “Chaikulhad”

Mera sapna.

Us parchi ko dekh kar mann halka sa muskura diya.
Laga… haan, kahin to jaana chahiye.
Kahin to jaana chahiye jahan mann lagta hai.

Aur tab ek hi jagah yaad aayi…

Vahi jagah… jahan main uske saath jaya karta tha.
Vahi jahan use hans kar chai pilaya karta tha.
Vahi jahan mann ko halka sa sukoon milta tha.

Safar Baarish Mein

Main ghar se nikal pada… paidal.

Halki-halki baarish mere raaste mein aa rahi thi,
par main unhe halka sa peeche dhakel kar aage badhta gaya.

Metro lene ka mann tha…
par aaj kuch alag karna tha.

Socha — aaj bus se chalte hain.

₹15 ki ticket li… aur bus mein chadh gaya.

Bus 623 Aur Ek Anjaan Safar

Bus mein ek uncle ke paas seat khali thi.
Unhone mujhe dekha aur pyaar se bola:

“Beta, aajao yahan baith jao.”

Main muskura kar unke paas baith gaya — window seat.

Bus number 623, baarish ko cheerte hue aage badh rahi thi…
aur main bas bahar dekhte hue apne hi khayalon mein kho gaya.

Raaste jaane pehchaane the…
par aaj kuch alag lag rahe the.

Manzil Ka Ehsaas

Thodi der baad bus India Gate ke paas aayi।

Driver ne halka sa left indicator diya…

Aur tab mujhe laga —
meri manzil ab door nahi hai.

Maine dheere se gardan ghumayi…
aur aankhon ke kone se dekha —

Shahjahan Road… aur meri chai.

Dil ko ek ajeeb si khushi mili…
jaise bas ab aur kuch nahi chahiye.

UPSC Lane Ka Khoka

Main bus se utar kar road cross ki…
aur pahunch gaya UPSC Bhawan ke piche wali lane mein।

Shaam ke kareeb 4 baje ka waqt tha।

Wahi 2 bhai aur unke papa…
apni chai aur fal ki dukaan lagaaye hue the।

Mujhe dekhte hi muskura diye।

“Are Shubham babu… bohot dino baad!”

Main bhi muskura kar bola:

“Bhaiya, aaj hichki aa rahi thi… laga aap yaad kar rahe ho, to socha mil aata hoon.”

Unhone haste hue kaha:

“Aaiye… aaj aapko adrak wali kadak kulhad chai pilate hain… wahi aapki favourite.”

Adrak Ki Awaaz Aur Ubalti Chai

Main wahin khada umbrella pakad kar UPSC Bhawan ko dekh raha tha…

Peeche se adrak kutne ki awaaz aa rahi thi…
jo seedha dil tak ja rahi thi।

Aankhein un palon ko chup-chaap kaid kar rahi thi।

Main piche muda…

To dekha —
chai chalni se chann kar kulhad mein ja rahi thi।

Ek Kulhad, Ek Sukoon

2 pal baad bhaiya ne chai mere haath mein di।

Kulhad ki garmaahat…
adrak ki khushboo…
aur saath mein ek plate matthi।

Main chup-chaap ek ghunt li…

Aur pata nahi kab mann halka ho gaya।

Kuch Pal Jo Reh Jaate Hain

Kabhi-kabhi zindagi mein sab kuch theek nahi hota…
par ek choti si jagah, ek cup chai…
aur kuch apne log — sab theek kar dete hain।

Us din bhi kuch aisa hi hua।

Main bas wahan khada tha…
aur dheere-dheere khud ko phir se mehsoos kar raha tha।

Chai Premiyon Ke Naam

Agar kabhi aapka bhi mann bhari ho…

To ek baar zarur jaana
UPSC lane ki us choti si chai ki dukaan par।

Ho sakta hai…
aapko bhi wahan apna sukoon mil jaaye।

📍 Location ke liye email karein

– Aapka apna chai premi