About

Chaikulhad!

Bachpan…
Sabhi ka vo manmohak pal, vo yaadein jinme hum kabhi bhi kho jaate hain. Aaj jab unhe yaad karte hain to sab kuch kitna simple lagta hai. Vo mitti se khelna, zameen par daud lagana, school se aane ke baad bag ek taraf phenk dena aur ghar ke kapde pehen kar seedha khane par baith jaana.

Mujhe yaad hai main apni didi ke saath yellow chawal khaya karta tha. Aap kya khate the bachpan me? Agar yaad ho to mujhe zarur batana.

Jaldi-jaldi khana khane ke baad vo dopahar ki neend… aaj bhi yaad aati hai. Kyunki vo neend sach me sukoon wali hoti thi. Maa jab apna haath humare pet par rakh kar sulaati thi… ek alag hi sukoon aur protection feel hota tha. Hai na?

Shaam ko uthne ke baad maa ke haath ki chai milti thi. Us chai ka swaad aaj bhi wahi hai… bas umr thodi badh gayi hai. Aaj kal shaam ki chai kabhi kisi patri par mil jaati hai, kabhi ghar par, aur kabhi office ki break me.

Kabhi socha hai… bachpan me shaam ke time mummy-papa hume ghumane le jaaya karte the. Aur kabhi-kabhi India Gate ke paas kulhad wali chai pila dete the. Agar aapke shehar me bhi koi aisi chai ki yaad ho, to mujhe mail me zarur batana.

Shayad wahi se shuru hui meri kulhad chai ki pasand.

Par kyun?
Yaad aaya?

Bachpan me hum kabhi mitti chaat liya karte the… baarish hone ke baad geeli mitti ki khushboo ko mehsoos kiya karte the. Aaj shayad vo sab nahi kar sakte… par uska ehsaas kulhad ki chai aaj bhi karati hai.

Jab halki aanch par bani chai ek mitti ke kulhad me daali jaati hai… aur vo kulhad chai jab humare paas aati hai, to uski mitti ki sugandh kuch alag hi mehsoos hoti hai. Kabhi dhyaan se mehsoos karna… vo khushboo tumhe apni taraf kheench legi.

Aur jab tumhare honth us kulhad ke kinare ko chhu kar chai peene lagenge… to shayad ek pal ke liye bachpan ki vo mitti yaad aa jaaye.

Bas unhi mitti ke palon aur Delhi ki chai ke thikaanon ko apne lafzon me bayaan karne ke liye maine Chaikulhad banaya hai.

Yaha agar aap Delhi se ho, to un chai ke thikaanon par zarur jaaiyega jinhe main apne blogs me share karta hoon. Aur agar wahi swaad ghar par mehsoos karna chaho, to Chaikulhad ke kulhad bhi aapke liye honge.

Bas chai ke shaukeen logon ko saath lekar ye chhota sa platform banaya hai.

Khud padhiyega… mehsoos kijiye… aur agar pasand aaye to thoda sa pyaar zarur dijiye.

– Aapka apna chai premi